%%%%%%%%%%%%%%%%%%%%%%%%%%%%%%%%%%%%%% %UvAsayajjhayaNa of Vasunandi: %Based on the edition edited by Hiralal Jain %Bharatiya Jnanapitha %Jnanapitha Murtidevi Jaina Granthamala: Prakrit Grantha No.3 %Banaras 1952 % %%%%%%%%%%%%%%%%%%%%%%%%%%%%%%%%%%%%% siri visuNaMdi AiriyaviraiyaM uvAsayajjhayaNaM vasunandi-zrAvakAcAra suravaitirIDamaNikiraNavAridhArAhisittapayakamalaM/ varasayalavimalakevalapayAsiyAsesataccatthaM//1// sAyAro NAyAro bhaviyANaM jeNa desio dhammo/ NamiUNa taM jiNiMdaM sAvayadhammaM parUvemo//2// viulagiripavvae NaM iMdabhUiNA seNiyassa jaha siTThaM/ taha guruparivADIe bhaNijjamANaM NisAmeha//3// daMsaNavayasAmAiyaposahasacittarAibhatte ya/ baMbhAraMbhapariggahaaNumaNauddiTThadesavirayammi//4// eyArasa ThANAiM sammattavivajjiyassa jIvassa/ jamhA Na saMti tamhA sammattaM suNaha vocchAmi//5// attAgamataccANaM jaM saddahaNaM suNimmalaM hoi/ saMkAidosarahiyaM taM sammattaM muNeyavvaM//6// attA dosavimukko puvvAparadosavajjiyaM vayaNaM/ taccAiM jIvadavvAiyAiM samayamhi NeyANi//7// chuhataNhA bhayadoso rAo moho jarA rujA ciMtA/ miccU kheo seo arai mao vimhao jammaM//8// NiddA tahA visAo dosA eehiM vajjio attA/ vayaNaM tassa pamANaM saMtatthaparUvayaM jamhA//9// jIvAjIvAsavabaMdhasaMvaro NijjarA tahA mokkho/ eyAiM satta taccAiM saddahaMtassa sammattaM//10// siddhA saMsAratthA duvihA jIvA jiNehiM paNNattA/ asarIrA NaMtacauTThayaNNiyA NivvudA siddhA//11// saMsAratthA duvihA thAvaratasabheyao muNeyavvA/ paMcaviha thAvarA khidijalaggivAU vaNapphaiNo//12// pajjattApajjattA bAyarasuhumA Nigoya NicciyarA/ patteyapaiTThiyarA thAvarakAyA aNeyavihA//13// viticaupaMciMdiyabheyao tasA cauvvihA muNeyavvA/ pajjattiyarA saNNiyarabheyao huMti bahubheyA//14// AukulajoNimaggaNaguNajIvuvaogapANasaNNAhiM/ NAUNa jIvadavvaM saddahaNaM hoi kAyavvaM//15// duvihA ajIvakAyA u rUviNo arUviNo muNeyavvA/ khaMdhA desapaesA avibhAgI rUviNo cadudhA//16// saMyalaM muNehi khaMdhaM addhaM deso paesam addhaddhaM/ paramANU avibhAgI puggaladavvaM jiNuddiTThaM//17// puDhavI jalaM ca chAyA cauriMdiyavisayakammaparamANU/ aithUlathUlathUlaM suhumaM suhumaM ca aisuhamaM//18// cauviham arUvidavvaM dhammAdhammaMvarANi kAlo ya/ gaiThANuggahaNalakkhaNANi taha vaTTaNaguNo ya//19// paramattho vavahAro duviho kAlo jiNehiM paNNatto/ loyAyAsapaesaTThiyANavo mukkhakAlassa//20// goNasamayassa ee kAraNabhUyA jiNehi NiddiTThA/ tIdANAgadabhUo vavahAro NaMtasamao ya//21// pariNAmijIvamuttAiehi NAUNa davvasabbhAvaM/ jiNavayaNam aNusaraMtehi thiramai hoi kAyavvA//22// pariNAmi jIva muttaM sapaesaM eyakhitta kiriyA ya/ NiccaM kAraNakattA savvagadam iyaramhi apaveso//23// duNNi ya eyaM eyaM paMca ya tiya eya duNNi cauro ya/ paMca ya eyaM eyaM mUlassa ya uttare NeyaM//24// suhumA avAyavisayA khaNakhaiNo atthapajjayA diTThA/ vaMjaNapajjAyA puNa thUlA giragoyarA ciravivatthA//25// pariNAmajudo jIo gaigamaNuvalaMbhao asaMdeho/ taha puggalo ya pAhaNapahuipariNAmadaMsaNA NAuM//26// vaMjaNapariNaivirahA dhammAdIA have apariNAmA/ atthapariNAmamAsiya savve pariNAmiNo atthA//27// jIvo hu jIvadavvaM ekkaM ciya ceyaNAcuyA sesA/ muttaM puggaladavvaM rUvAdiviloyaNA Na sesANi//28// sapaesa paMca kAlaM muttUNa paesasaMcayA NeyA/ apaesI khalu kAlo paesabaMdhaccudo jamhA//29// dhammAdhammAgAsA egasarUvA paesaaviogA/ vavahArakalapuggalajIvA hu aNeyarUvA te//30// AgAsam eva khittaM avagAhaNalakkhaNaM jado bhaNiyaM/ sesANi puNo 'khittaM avagAhaNalakkhaNAbhAvA//31// sakkiriya jIvapuggala gamaNAgamaNAikiriyauvalaMbhA/ sesANi puNa viyANasu kiriyAhINANi tadabhAvA//32// muttA jIvaM kAyaM NiccA sesA payAsiyA samaye/ vaMjaNapariNAmacuyA iyare taM pariNayaM pattA//33// jIvassuvayArakarA kAraNabhUyA hu paMca kAyAI/ jIvo sattAbhUo so tANaM Na kAraNaM hoi//34// kattA suhAsuhANaM kammANaM phalabhoyao jamhA/ jIvo tapphalabhoyA bhoyA sesA Na kattArA//35// savvagadattA savvagamAyAsaM Neva sesagaM davvaM/ appariNAmAdIhi ya bohavvA te payatteNa//36// tANa paveso vi tahA Neo aNNoNNam aNupaveseNa/ NiyaNiyabhAvaM pi sayA egIhuMtA vi Na muyaMti//37// aNNoNNaM pavisaMtA diMtA uggAsam aNNamaNNesiM/ mellaMtA vi ya NiccaM sagasagabhAvaM Na vi cayaMsi//38// micchattAviraikasAyajoyaheUhiM Asavai kammaM/ jIvamhi uvahimajjhe jaha salilaM chiddaNAvAe//39// arahaMbhattiyAisu suhovaogeNa Asavai puNNaM/ vivarIeNa du pAvaM NiddiTThaM jiNavariMdehi//40// aNNoNNANupaveso jo jIvapaesakammakhadhANaM/ so payaDiTThidiaNubhavapaesado cauviho baMdho//41// sammattehiM vaehiM ya kohAikasAyaNiggahaguNehi/ jogaNiroheNa tahA kammAsavasaMvaro hoi//42// savivAgA avivAgA duvihA puNa nijjarA muNeyavvA/ savvesiM jIvANaM paDhamA vidiyA tavassINaM//43// jaha ruddhammi pavese sussai sarapANiyaM ravikarehiM/ taha Asave Niruddhe tavasA kammaM muNeyavvaM//44// Nissesakammamokkho mokkho jiNasAsaNe samuddiTTho/ tamhi kae jIvo 'yaM aNuhavai aNaMtayaM sokkhaM//45// NiddesaM sAmittaM sAhaNam ahiyaraNaThidi vihANANi/ eehi savvabhAvA jIvAdIyA muNeyavvA//46// satta vi taccANi mae bhaNiyANi jiNAgamANusAreNa/ eyANi saddahaMto sammAiTThI muNeyavvo//47// NissaMkA NikkaMkhA NivvidigicchA amUDhadiTThI ya/ uvagUhaNa ThidiyaraNaM vacchalla pahAvaNA ceva//48// saMveo Nivveo NiMdA garahA uvasamo bhattI/ vacchallaM aNukaMpA aTTha guNA huMti sammatte//49// iccAiguNA bahavo sammattavisohikArayA bhaNiyA/ jo ujjamedi esu sammAiTThI jiNakkhAdo//50// saMkAidosarahio NissaMkAiguNajuyaM paramaM/ kammaNijjaraNaheU taM suddhaM hoi sammattaM//51// rAyagihe NissaMko coro NAmeNa aMjaNo bhaNio/ caMpAe NikkaMkhA vaNigasudA NaMtamaiNAmA//52// Nivvidigiccho rAo uddAyaNu NAma ruddavaraNayare/ revai mahurA Nayare amUDhadiTThI muNeyavvA//53// ThidiyaraNaguNapautto mAgahaNayaramhi vAriseNo du/ hathaNApuramhi Nayare vacchallaM viNhuNA raiyaM//54// uvagUhaNaguNajutto jiNayatto tAmalittaNayarIe/ vajjakumAreNa kayA pahAvaNA ceva mahurAe//55// erisaguNaaTThajuyaM sammattaM jo dharei diDhacitto/ so havai sammadiTThI saddahamANo payatthe ya//56// paMcuMbarasahiyAiM satta vi visaNAiM jo vivajjei/ sammattavisuddhamaI so daMsaNasAvao bhaNio//57// uMbaravaDapippalapiMparIyasaMdhANatarupasUNAiM/ NiccaM tasasaMsiddhAiM tAiM parivajjiyavvAiM//58// jUyaM majjaM maMsaM vesA pAraddhicoraparayAraM/ duggaigamaNassedANi heubhUdANi pAvANi//59// jUyaM khelaMtassa hu koho mAyA ya mANalohA ya/ ee havaMti tivvA pAvai pAvaM tado bahugaM//60// pAveNa teNa jaramaraNavIcipaurammi dukkhasalilammi/ caugaigamaNAvattammi hiMDai bhavasamuddammi//61// tattha vi dukkham aNaMtaM cheyaNabheyaNa vikattaNAINaM/ pAvai saraNavirahio jUyassa phaleNa so jIvo//62// Na gaNei iTThamittaM Na guruM Na ya mAyaraM piyaraM vA/ jUvaMdho vujjAiM kuNai akajjAiM bahuyAiM//63// sajaNe ya parajaNe vA dese savvattha hoi Nillajjo/ mAyA vi Na vissAsaM vaccai jUyaM ramaMtassa//64// aggivisacorasappA dukkhaM thovaM kuNaMti ihaloe/ dukkhaM jaNei jUyaM Narassa bhavasayasahassesu//65// akkhehi Naro rahio Na muNai sesiMdiehiM veei/ jUyaMdho Na ya keNa vi jANai saMpuNNakaraNo vi//66// aliyaM karei savahaM jaMpai mosaM bhaNei aiduTThaM/ pAsammi bahiNimAyaM sisuM pi haNei kohaMdho//67// Na ya bhuMjai AhAraM NiddaM Na lahei rattidiNNaM ti/ kattha vi Na kuNei raiM atthai ciMtAuro NiccaM//68// iccevamAibahavo dose NAUNa jUyaramaNammi/ parihariyavvaM NiccaM daMsaNaguNam uvvahaMteNa//69// majjeNa Naro avaso kuNei kammANi NiMdaNijjAiM/ ihaloe paraloe aNuhavai aNaMtayaM dukkhaM//70// ailaMghio viciTTho paDei ratthAyayaMgaNe matto/ paDiyassa sArameyA vayaNaM vilihaMti jibbhAe//71// uccAraM passavaNaM tattheva kuNaMti to samullavai/ paDio vi surA miTTho puNo vi me dei mUDhamaI//72// jaM kiMci tassa davvaM ajANamANassa hippai parehiM/ lahiUNa kiMci saNNaM ido tado dhAvai khalaMto//73// jeNajja majjha davvaM gahiyaM duTTheNa se jamo kuddho/ kahiM jAi so jivaMto sIsaM chiMdAmi khaggeNa//74// evaM so gajjaMto kuvio gaMtUNa maMdiraM NiyayaM/ ghittUNa lauDi sahasA ruTTho bhaMDAiM phoDei//75// NiyayaM pi suyaM bahiNiM aNicchamANaM balA vidhaMsei/ jaMpai ajaMpaNijjaM Na vijANai kiM pi mayamatto//76// iya avarAiM bahuso kAUNa bahUNi lajjaNijjANi/ aNubaMdhai bahu pAvaM majjassa vasaMgado saMto//77// pAveNa teNa bahuso jAijarAmaraNasAvayAiNNe/ pAvai aNaMtadukkhaM paDio saMsArakaMtAre//78// evaM bahuppayAraM dosaM NAUNa majjapANammi/ maNavayaNakAyakayakAridANumoehiM vajjijjo//79// jaha majjaM taha ya mahU jaNayadi pAvaM Narassa aibahuyaM/ asui vva NiMdaNijjaM vajjeyavvaM payatteNa//80// daTThUNa asaNamajjhe paDiyaM jai macchiyaM pi NiTThivai/ kaha macchiyaMDayANaM NijjAsaM NigghiNo pibai//81// bho bho jibbhiMdiyaluddhayANamaccherayaM paloeha/ kimi macchiyaNijjAsaM mahuM pavittaM bhaNaMti jado//82// loge vi suppasiddhaM bAraha gAmAi jo Dahai adao/ tatto so ahiyayaro pAviTTho jo mahuM haNai//83// jo avalehai NiccaM NirayaM so jAi Natthi saMdeho/ evaM NAUNa phuDaM vajjeyavvaM mahuM tamhA//84// maMsaM amejjhasarisaM kimikulabhariyaM dugaMdhavIbhacchaM/ pAeNa chiveuM jaM Na tIrae taM kahaM bhottuM//85// maMsAsaNeNa vaDDhai dappo dappeNa majjamahilasai/ jUyaM pi ramai to taM pi vaNNie pAuNai dose//86// loiya satthammi vi vaNNiyaM jahA gayaNagAmiNo vippA/ bhuvi maMsAsaNeNa paDiyA tamhA Na pauMjae maMsaM//87// kAruyakirAyacaMDAlaDoMbapArasiyANamucchiTThaM/ so bhakkhei jo saha vasai eyarattiM pi vessAe//88// rattaM NAUNa NaraM savvassaM harai vaMcaNasaehiM/ kAUNa muyai pacchA purisaM cammaTThiparisesaM//89// pabhaNai purao eyassa sAmI mottUNa Natthi me aNNo/ uccai aNNassa puNo karei cADUNi bahuyANi//90// mANI kulajo sUro vi kuNai dAsattaNaM pi NIcANaM/ vessAkaeNa bahugaM avamANaM sahai kAmaMdho//91// je majjamaMsadosA vessAgamaNammi hoMti te savve/ pAvaM pi tattha hiTThaM pAvai NiyameNa savisesaM//92// pAveNa teNa dukkhaM pAvai saMsArasAyare ghore/ tamhA parihariyavvA vessA maNavayaNakAehiM//93// sammattassa pahANo aNukaMvA vaNNio guNo jamhA/ pAraddhiramaNasIlo sammattavirAhao tamhA//94// daTThUNa mukkakesaM palAyamANaM tahA parAhuttaM/ radadhariyatiNaM sUrA kayAparAhaM vi Na haNaMti//95// NiccaM palAyamANo tiNacArI taha NiravarAho vi/ kaha NigghaNo haNijjai AraNNaNivAsiNo vi mae//96// gobaMbhaNitthighAyaM pariharamANassa hoi jai dhammo/ savvesiM jIvANaM dayAe tA kiM Na so hujjA//67// gobaMbhaNamahilANaM viNivAe havai jaha mahApAvaM/ taha iyarapANighAe vi hoi pAvaM Na saMdeho//98// mahumajjamaMsasevI pAvai pAvaM cireNa jaM ghoraM/ taM eyadiNe puriso lahei pAraddhiramaNeNa//99// saMsArammi aNaMtaM dukkhaM pAuNadi teNa pAveNa/ tamhA vivajjiyavvA pAraddhI desaviraeNa//100// paradavvaharaNasIlo ihaparaloe asAyabahulAo/ pAuNai jAyaNAo Na kayAvi suhaM paloei//101// hariUNa parassa dhaNaM coro parivevamANasavvaMgo/ caiUNa NiyayagehaM dhAvai uppaheNa saMtatto//102// kiM keNa vi diTTho haM Na vetti hiyaeNa dhagadhagaMteNa/ lhukkai palAi pakhalai NiddaM Na lahei bhayaviTTho//103// Na gaNei mAyavappaM gurumittaM sAmiNaM tavassiM vA/ pabaleNa harai chaleNa kiMciNNaM kiMpi jaM tesiM//104// lajjA tahAbhimANaM jasasIlaviNAsamAdaNAsaM ca/ paraloyabhayaM coro agaNaMto sAhasaM kuNai//105// haramANo paradavvaM daTThUNArakkhiehiM to sahasA/ rajjUhiM baMdhiUNaM ghippai so morabaMdheNa//106// hiMDAvijjai TiMTe ratthAsu caDhAviUNa kharapuTThiM/ vitthArijjai coro eso tti jaNassa majjhammi//107// aNNo vi parassa dhaNaM jo harai so erisaM phalaM lahai/ evaM bhaNiUNa puNo Nijjai purabAhire turiyaM//108// NettuddhAraM aha pANipAyagahaNaM NisuMbhaNaM ahavA/ jIvaMtassa vi sUlAvArohaNaM kIrai khalehiM//109// evaM picchaMtA vi hu paradavvaM coriyAi geNhaMti/ Na muNaMti kiM pi sahiyaM pecchaha ho mohamAhappaM//110// paraloe vi ya coro caugaisaMsArasAyaranimaNNo/ pAvai dukkham aNaMtaM teyaM parivajjae tamhA//111// daTThUNa parakalattaM NibbuddhI jo karei ahilAsaM/ Na ya kiM pi tattha pAvai pAvaM em eva ajjei//112// Nissasai ruyai gAyai NiyayasiraM haNai mahiyale paDai/ paramahilam alabhamANo asappalAvaM pi jaMpei//113// ciMtei maM kim icchai Na vei sA keNa vA uvAeNa/ "aNNemi" kahami kassa vi Na vetti ciMtAuro sadadaM//114// Na ya kattha vi kuNai raiM miTThaM pi ya bhoyaNaM Na bhuMjei/ NiddaM pi alahamANo acchai viraheNa saMtatto//115// lajjAkulamajjAyaM chaMDiUNa majjAibhoyaNaM kiccA/ paramahilANaM cittaM amuNaMto patthaNaM kuNai//116// NecchaMti jai vi tAo uvayArasayANi kuNai so taha vi/ NibbhacchijjaMto puNa appANaM jhUrai vilakkho//117// aha bhuMjai paramahilaM aNicchamANaM balA dhareUNaM/ kiM tattha havai sukkhaM paccelliu pAvae dukkhaM//118// aha kAvi pAvabahulA asaI NiNNAsiUNa NiyasIlaM/ sayam eva pacchiyAo uvarohavaseNa appANaM//119// jai dei taha vi tattha suNNaharakhaMDadeulayamajjhammi/ saccitte bhayabhIo sokkhaM kiM tattha pAugai//120// soUNa kiM pi saddaM sahasA parivevamANasavvaMgo/ lhukkai palAi pakhalai cauddisaM Niyai bhayabhIo//121// jai puNa keNa vi dIsai Nijjai to baMdhiUNa NivagehaM/ corassa NiggahaM so tattha vi pAuNai savisesaM//122// pecchaha mohaviNaDio logo daTThUNa erisaM dosaM/ paccakkhaM taha vi khalo paritthimahilasadi duccitto//123// paraloyammi aNaMtaM dukkhaM pAuNai ihabhavasamuddammi/ parayArA paramahilA tamhA tiviheNa vajjijjA//124// rajjabbhaMsaM vasaNaM bAraha saMvaccharANi vaNavAso/ patto tahAvamANaM jUeNa juhiTThilo rAyA//125// ujjANammi ramaMtA tisAbhibhUyA jala tti NAUNa/ pibiUNa juNNamajjaM NaTThA te jAdavA teNa//126// maMsAsaNeNa giddho vagarakkho egacakkaNayarammi/ rajjAo pabbhaTTho ayaseNa muo gao NarayaM//127// savvattha NivuNabuddhI vesAsaMgeNa cArudatto vi/ khaiUNa dhaNaM patto dukkhaM paradesagamaNaM ca//128// hoUNa cakkavaTTI caudaharayaNAhio vi saMpatto/ mariUNa baMbhadatto NirayaM pAraddhiramaNeNa//129// NAsAvahAradoseNa daMDaNaM pAviUNa siribhUI/ mariUNa aTTajhANeNa hiMDio dIhasaMsAre//130// hoUNa khayaraNAho viyakkhaNo addhacakkavaTTI vi/ mariUNa gao NarayaM paritthiharaNeNa laMkeso//131// ede mahANubhAvA dosaM ekkekkavisaNasevAo/ pattA jo puNa satta vi sevai vaNNijjae kiM so//132// sAkete sevaMto satta vi vasaNAiM ruddadatto vi/ mariUNa gao NirayaM bhamio puNa dIhasaMsAre//133// sattaNhaM visaNANaM phaleNa saMsArasAyare jIvo/ jaM pAvai bahudukkhaM taM saMkheveNa vocchAmi//134// aiNiTThurapharusAiM pUiruhirAiM aidugaMdhAiM/ asuhAvahAiM NiccaM NiraesuppattiThANAiM//135// to tesu samuppaNNo AhAreUNa poggale asuhe/ aMtomuhuttakAle pajjattIo samANei//136// uvavAyAo NivaDai pajjattayao daMDatti mahivIDhe/ aikakkhaDam asahaMto sahasA uppaDadi puNa paDai//137// jai ko vi usiNaNarae merupamANaM khivei lohaMDaM/ Na vi pAvai dharaNitalaM vilijja taM aMtarAle vi//138// aha tevaMDhaM tattaM khivei jai ko vi sIyaNarayammi/ sahasA dharaNimapattaM saDijja taM khaMDakhaMDehiM//139// taM tArisasIduNhaM khettasahAveNa hoi Niraesu/ visahai jAvajjIvaM vasaNassa phaleNimo jIo//140// to tamhi jAyamatte sahasA daTThUNa NArayA savve/ paharaMti sattimuggaratisUlaNArAyakhaggehiM//141// to khaMDiyasavvaMgo karuNapalAvaM ruvei dINamuho/ pabhaNaMti tao ruTThA kiM kaMdasi re durAyArA//142// jovvaNamaeNa matto lohakasAeNa raMjio puvvaM/ guruvayaNaM laMghittA jUyaM ramio jaM Asi//143// tassa phalamudayamAgayamalaM hi ruyaNeNa visaha re duTTha/ rovaMto vi Na chuTTasi kayAvi puvvakayakammassa//144// evaM soUNa tao mANasadukkhaM vi se samuppaNNaM/ to duvihadukkhadaDDho rosAiTTho imaM bhaNai//145// jai vA puvvammi bhave jUyaM ramiyaM mae madavaseNa/ tumhaM ko avarAho kao balA jeNa maM haNaha//146// evaM bhaNie ghittUNa suTThu ruTThehiM aggikuMDammi/ pajjalayammi Nihitto Dajjhai so aMgamaMgesu//147// tatto NissaramANaM daTThUNa jjhasarehiM ahava kuMtehiM/ pilleUNa ruDaMtaM tattheva chuhaMti adayAe//148// hA muyaha maM mA paharaha puNo vi Na karemi erisaM pAvaM/ daMtehi aMgulIo dharei karuNaM puNo ruvai//149// Na muyaMti taha vi pAvA pecchaha lIlAe kuNai jaM jIvo/ taM pAvaM vilavaMto eyahiM dukkhehiM Nittharai//150// tatto palAiUNaM kaha vi ya mAeNa daDDhasavvaMgo/ girikaMdarammi sahasA pavisai saraNa tti maNNaMto//151// tattha vi paDaMti uvariM silAu to tAhiM cuNNio saMto/ galamANaruhiradhAro raDiUNa khaNaM tao NIi//152// NeraiyANa sarIraM kIrai jai tilapamANakhaMDAi/ pAradarasuvva laggai apuNNakAlammi Na marei//153// tatto palAyamANo ruMbhai so NAraehiM daTThUNa/ pAijjai vilavaMto ayataMbayakalayalaM tattaM//154// paccArijjai jaM te pIyaM majjaM mahuM ca puvvabhave/ taM pAvaphalaM pattaM pibehi ayakalayalaM ghoraM//155// kaha vi tao jai chuTTo asipattavaNammi visai bhayabhIo/ NibaDaMti tattha pattAiM khaggasarisAiM aNavarayaM//156// to tamhi pattapaDaNeNa chiNNakaracaraNa bhiNNapuTThisiro/ pagalaMtaruhiradhAro kaMdaMto so tao NIi//157// turiyaM palAyamANaM sahasA dhariUNa NArayA kUrA/ chittUNa tassa maMsaM tuMDammi chuhaMti tasseva//158// bhottuM aNicchamANaM NiyamaMsaM to bhaNaMti re duTTha/ aimiTThaM bhaNiUNa bhakkhaMto Asi jaM puvvaM//159// taM kiM te vissariyaM jeNa muhaM kuNasi re parAhuttaM/ evaM bhaNiUNa kusiM chuhiMti tuMDammi pajjaliyaM//160// aitivvadAhasaMtAvio tisAveyaNAsamabhibhUo/ kimipUiruhirapuNNaM vaitaraNiNai tao visai//161// tattha vi paviTThamitto khAruNhajaleNa daDDhasavvaMgo/ Nissarai tao turio hAhAkAraM pakuvvaMto//162// daTThUNa NArayA NIlamaMDave tattalohapaDimAo/ AliMgAviMti tahiM dhariUNa balA vilavamANaM//163// agaNittA guruvayaNaM paritthivesaM ca Asi sevaMto/ eNhiM taM pAvaphalaM Na sahasi kiM ruvasi taM jeNa//164// puvvabhave jaM kammaM paMciMdiyavasagaeNa jIveNa/ hasamANeNa vibaddhaM taM kiM Nittharasi rovaMto//165// kikavAyagiddhabAyasarUvaM dhariUNa NArayA ceva/ paharaMti vajjamayatuMDatikkhaNaharehiM dayarahiyA//166// dhariUNa uDDhajaMghaM karakacacakkehiM kei phADaMti/ musalehiM muggarehiM ya cuNNI cuNNI kuNaMti pare//167// jibbhAcheyaNa NayaNANa phoDaNaM daMtacUraNaM dalaNaM/ malaNaM kuNaMti khaMDaMti keI tilamattakhaMDehiM//168// aNNe kalaMvavAluyathalammi tattammi pADiUNa puNo/ loTTAviMti raDaMtaM NihaNaMti ghasaMti bhUmIe//169// asurA vi kUrapAvA tattha vi gaMtUNa puvvaverAiM/ sumarAviUNa tao juddhaM lAyaMti aNNoNNaM//170// satteva aholoe puDhavIo tattha sayasahassAiM/ NirayANaM culasII seDhiMdapaiNNayANa have//171// rayaNappahasakkarapahabAluppahapaMkadhUmatamabhAsA/ tamatamapahA ya puDhavINaM jANa aNuvatthaNAmAiM//172// paDhamAe puDhavIe vAsasahassAiM daha jahaNNAU/ samayammi vaNNiyA sAyarovamaM hoi ukkassaM//173// paDhamAi jamukkassaM vidiyAisu sAhiyaM jahaNNaM taM/ tiya satta dasa ya sattarasa dusahiyA bIsa tettIsaM//174// sAyarasaMkhA esA kameNa vidiyAi jANa puDhavIsu/ ukkassAupamANaM NiddiTThaM jiNavariMdehi//175// ettiyapamANakAlaM sArIraM mANasaM bahupayAraM/ dukkhaM sahei tivvaM vasaNassa phaleNimo jIvo//176// tiriyagaIe vi tahA thAvarakAesu bahupayAresu/ acchai aNaMtakAlaM hiMDaMto joNilakkhesu//177// kaham avi NissariUNaM tatto viyaliMdiesu saMbhavai/ tattha vi kilissamANo kAlam asaMkhejjayaM vasai//178// to khillavillajoeNa kaha vi paMciMdiesu uvavaNNo/ tattha vi asaMkhakAlaM joNisahassesu paribhamai//179// cheyaNabheyaNatADaNatAsaNaNillaMchaNaM tahA damaNaM/ NikkhalaNamalaNadalaNaM paulaNa ukkattaNaM ceva//180// baMdhaNabhArArovaNa laMchaNa pANaNNarohaNaM sahaNaM/ sIuNhabhukkhataNhAdijANa taha pillayavioyaM//181// iccevamAi bahuyaM dukkhaM pAuNai tiriyajoNIe/ visaNassa phaleNa jado vasaNaM parivajjae tamhA//182// maNuyatte vi ya jIvA dukkhaM pAvaMti bahuviyappehiM/ iTThANiTThesu sayA viyoyasaMyoyajaM tivvaM//183// uppaNNapaDhamasamayamhi koI jaNaNIi chaMDio saMto/ kAraNavaseNa itthaM sIuNhabhukkhataNhAuro marai//184// bAlattaNe vi jIvo mAyApiyarehi kovi parihINo/ ucchiTThaM bhakkhaMto jIvai dukkheNa paragehe//185// puvvaM dANaM dAUNa ko vi sadhaNo jaNassa jahajogaM/ pacchA so dhaNarahio Na lahai kUraM pi jAyaMto//186// aNNo u pAvaroeNa bAhio Nayarabajjhadesammi/ acchai sahAyarahio Na lahai saghare vi ciTTheuM//187// tisao vi bhukkhio haM puttA me dehi pANam asaNaM ca/ evaM kUvaMtassa vi Na koi vayaNaM ca se dei//188// to royasoyabhario savvesiM savvahiyAu dAUNa/ dukkheNa marai pacchA dhigatthu maNuyattaNam asAraM//189// aNNANi evamAINi jANi dukkhANi maNuyaloyammi/ dIsaMti tANi pAvai vasaNassa phaleNimo jIvo//190// kiMcuvasameNa pAvassa kaha vi devattaNaM vi saMpatto/ tattha vi pAvai dukkhaM visaNajjiyakammapAgeNa//191// daTThUNa mahaDDhINaM devANaM ThiijjariddhimAhappaM/ appaDDhio visUrai mANasadukkheNa DajjhaMto//192// hA maNuyabhave uppajjiUNa tavasaMjamaM vi laddhUNa/ mAyAe jaM vi kayaM devaduggayaM teNa saMpatto//193// kaMdappakibbhisAsuravAhaNasammohadevajAIsu/ jAvajjIvaM Nivasai visahaMto mANasaM dukkhaM//194// chammAsAuyasese vatthAharaNAiM huMti maliNAiM/ NAUNa cavaNakAlaM ahiyayaraM ruyai sogeNa//165// hA hA kaha Nilloe kimikulabhariyammi aidugaMdhammi/ NavamAsaM pUiruhirAulammi gabbhammi vasiyavvaM//196// kiM karami kattha vaccami kassa sAhAmi jAmi kaM saraNaM/ Na vi atthi ettha baMdhU jo me dhArei NivaDaMtaM//197// vajjAuho mahappA erAvaNabAhaNo suriMdo vi/ jAvajjIvaM so sevio vi Na dharei maM tahavi//198// jai me hohihi maraNaM tA hojjau kiMtu me samuppattI/ egiMdiesu jAijjA No maNussesu kaiyA vi//199// ahavA kiM kuNai purAjjiyammi udayAgayammi kammammi/ sakko vi jado Na tarai appANaM rakkhiuM kAle//200// evaM bahuppayAraM saraNavirahio kharaM vilavamANo/ eiMdiesu jAyai mariUNa tao NiyANeNa//201// tattha vi aNaMtakAlaM kilissamANo sahei bahudukkhaM/ micchattasaMsiyamaI jIvo kiM kiM dukkhaM Na pAvijjai//202// picchaha divve bhoe jIvo bhottUNa devaloyammi/ eiMdiesu jAyai dhigatthu saMsAravAsassa//203// evaM bahuppayAraM dukkhaM saMsArasAyare ghore/ jIvo saraNavihINo visaNassa phaleNa pAuNai//204// paMcuMbarasahiyAiM pariharei iya jo satta visaNAiM/ sammattavisuddhamaI so daMsaNasAvayo bhaNio//205// evaM daMsaNasAvayaThANaM paDhamaM samAsao bhaNiyaM/ vayasAvayaguNaThANaM etto vidiyaM pavakkhAmi//206// paMceva aNuvvayAiM guNavvayAiM havaMti puNa tiNNi/ sikkhAvayANi cattAri jANa vidiyammi ThANammi//207// pANAivAyaviraI saccam adattassa vajjaNaM ceva/ thUlayaDa baMbhaceraM icchAe gaMthaparimANaM//208// je tasakAyA jIvA puvvuddiTThA Na hiMsiyavvA te/ eiMdiyA vi NikkAraNeNa paDhamaM vayaM thUlaM//209// aliyaM Na jaMpaNIyaM pANibahakaraM tu saccavayaNaM pi/ rAyeNa ya doseNa ya NeyaM vidiyaM vayaM thUlaM//210// puragAmapaTTaNAisu paDiyaM NaTThaM ca Nihiya vIsariyaM/ paradavvam agiNhaMtassa hoi thUlavayaM tadiyaM//211// pavvesu itthisevA aNaMgakIDA sayA vivajjaMto/ thUlayaDabaMbhayArI jiNehi bhaNio pavayaNammi//212// jaM parimANaM kIrai dhaNadhaNNahiraNNakaMcaNAINaM/ taM jANa paMcamavayaM NiddiTTham uvAsayajjhayaNe//213// puvvuttaradakkhiNapacchimAsu kAUNa joyaNapamANaM/ parado gamaNaNiyattI disi vidisi guNavvayaM paDhamaM//214// vayabhaMgakAraNaM hoi jammi desammi tattha NiyameNa/ kIrai gamaNaNiyattI taM jANa guNavvayaM vidiyaM//215// ayadaMDapAsavikkaya kUDatulAmANa kUrasattANaM/ jaM saMgaho Na kIrai taM jANa guNavvayaM tadiyaM//216// jaM parimANaM kIrai maMDaNataMbolagaMdhapupphANaM/ taM bhoyavirai bhaNiyaM paDhamaM sikkhAvayaM sutte//217// sagasattIe mahilAvatthAharaNANa jaM tu parimANaM/ taM paribhoyaNivuttI vidiyaM sikkhAvayaM jANa//218// atihissa saMvibhAgo taiyaM sikkhAvayaM muNeyavvaM/ tattha vi paMcahiyArA NeyA suttANumaggeNa//219// pattaMtara dAyAro dANavihANaM taheva dAyavvaM/ dANassa phalaM NeyA paMcahiyArA kameNede//220// tivihaM muNeha pattaM uttamamajjhimajahaNNabheeNa/ vayaNiyamasaMjamadharo uttamapattaM have sAhU//221// eyArasa ThANaThiyA majjhimapattaM khu sAvayA bhaNiyA/ avirayasammAiTThI jahaNNapattaM muNeyavvaM//222// vayatavasIlasamaggo sammattavivajjio kupattaM tu/ sammattasIlavayavajjio apattaM have jIo//223// saddhA bhattI tuTThI viNNANamaluddhayA khamA sattI/ jatthede satta guNA taM dAyAraM pasaMsaMti//224// paDigahamuccaTThANaM pAdodayamaccaNaM ca paNamaM ca/ maNavayaNakAyasuddhI esaNasuddhI ya dANavihI//225// pattaM NiyagharadAre daTThUNaNNattha vA vimaggittA/ paDigahaNaM kAyavvaM Namotthu ThAhu tti bhaNiUNa//226// NeUNa NiyayagehaM NiravajjANu taha uccaThANammi/ ThaviUNa tao calaNANaM dhovaNaM hoi kAyavvaM//227// pAodayaM pavittaM sirammi kAUNa accaNaM kujjA/ gaMdhakkhayakusumaNevajjadIvadhUvehiM ya phalehiM//228// pupphaMjaliM khivittA payapurao vaMdaNaM tao kujjA/ caiUNa aTTarudde maNasuddhI hoi kAyavvA//229// NiTThurakakkasa vayaNAivajjaNaM taM viyANa vacisuddhiM/ savvattha saMpuDaMgassa hoi taha kAyasuddhI vi//230// caudasamalaparisuddhaM jaM dANaM sohiUNa jaiNAe/ saMjayijaNassa dijjai sA NeyA esaNAsuddhI//231// dANasamayammi evaM suttaNusAreNa Nava vihANANi/ bhaNiyANi mae eNhiM dAyavvaM vaNNaissAmi//232// AhArosahasatthAbhayabheo jaM cauvvihaM dANaM/ taM vuccai dAyavvaM NiddiTTham uvAsayajjhayaNe//233// asaNaM pANaM khAimaM sAiyam idi cauviho varAhAro/ puvvuttaNavavihANehiM tivihapattassa dAyavvo//234// aibuDDhabAlamUyaMdhabahiradesaMtarIyaroDANaM/ jahajoggaM dAyavvaM karuNAdANa tti bhaNiUNa//235// uvavAsavAhiparisamakilesaparipIDayaM muNeUNa/ patthaM sarIrajoggaM bhesajadANaM pi dAyavvaM//236// AgamasatthAiM lihAviUNa dijjaM ti jaM jahAjoggaM/ taM jANa satthadANaM jiNavayaNajjhAvaNaM ca tahA//237// jaM kIrai parirakkhA NiccaM maraNabhayabhIrujIvANaM/ taM jANa abhayadANaM sihAmaNiM savvadANANaM//238// aNNANiNo vi jamhA kajjaM Na kuNaMti NipphalAraMbhaM/ tamhA dANassa phalaM samAsado vaNNaissAmi//239// jaha uttamammi khitte paiNNamaNNaM subahuphalaM hoi/ taha dANaphalaM NeyaM diNNaM tivihassa pattassa//240// jaha majjhimammi khitte appaphalaM hoi vAviyaM bIyaM/ majjhimaphalaM vijANaha kupattadiNNaM tahA dANaM//241// jaha Usarammi khitte paiNNabIyaM Na kiM pi ruhei/ phalavajjiyaM viyANaha apattadiNNaM tahA dANaM//242// kamhi apattavisese diNNaM dANaM duhAvahaM hoi/ jaha visaharassa diNNaM tivvavisaM jAyae khIraM//243// mehAvINaM esA sAmaNNaparUvaNA mae uttA/ iNhiM pabhaNAmi phalaM samAsao maMdabuddhINaM//244// micchAdiTThI bhaddo dANaM jo dei uttame patte/ tassa phaleNuvavajjai so uttamabhoyabhUmIsu//245// jo majjhimammi pattammi dei dANaM khu bAmadiTThI vi/ so majjhimAsu jIvo uppajjai bhoyabhUmIsu//246// jo puNa jahaNNApattammi dei dANaM tahAviho vi Naro/ jAyai phaleNa jahaNNasu bhoyabhUmIsu so jIvo//247// jAyai kupattadANeNa vAmadiTThI kubhoyabhUmIsu/ aNumoyaNeNa tiriyA vi uttaTThANaM jahAjoggaM//248// baddhAugA sudiTThI aNumoyaNeNa tiriyA vi/ NiyameNuvavajjaMti ya te uttamabhogabhUmIsu//249// tattha vi dahappayArA kappadumA diMti uttame bhoe/ khettasahAveNa sayA puvvajjiyapuNNAsahiyANaM//250// majjaMgatUrabhUsaNajoisagihabhAyaNaMgadIvaMgA/ vatthaMgabhoyaNaMgA mAlaMgA suratarU dasahA//251// aisarasamaisugaMdhaM diTThaM ci ya jaM jaNei ahilAsaM/ iMdiyabalapuTThiyaraM majjaMgA pANayaM diMti//252// tayavitaya ghaNaM susiraM vajjaM tUraMgapAyavA diMti/ varamauDakuMDalAiyaAbharaNaM bhUsaNadumA vi//253// sasisUrapayAsAo ahiyapayAsaM kuNaMti joidumA/ NANAvihapAsAe diMti sayA gihadumA divve//254// kaccolakalasathAlAiyAiM bhAyaNadumA payacchaMti/ ujjoyaM dIvadumA kuNaMti gehassa majjhammi//255// varapaTTacINakhomAiyAiM vatthAiM diMti vatthadumA/ varacauviham AhAraM bhoyaNarukkhA payacchaMti//256// vara bahulaparimalAmoyamoiyAsAmuhAu mAlAo/ mAlAdumA payacchaMti vivihakusumehiM raiyAo//257// ukkiTThabhoyabhUmIsu je NarA udayasujjasamateyA/ chadhaNusahassuttuMgA huMti tipallAugA savve//258// dehassuccattaM majjhimAsu cattAri dhaNusahassAiM/ pallANi duNNi AU puNNiMdusamappahA purisA//259// dodhaNusahassuttuMgA maNuyA pallAugA jahaNNAsu/ uttattakaNayavaNNA havaMti puNNANubhAveNa//260// je puNa kubhoyabhUmIsu sakkarasamasAyamaTTiyAhArA/ phalapupphAhArA keI tattha pallAugA savve//261// jAyaMti juyalajuyalA uNavaNNadiNehiM jovvaNaM tehiM/ samacaurasasaMThANA varavajjasarIrasaMghayaNA//262// bAhattarikalasahiyA causaTThiguNaNNiyA taNukasAyA/ battIsalakkhaNadharA ujjamasIlA viNIyA ya//263// NavamAsAugi sese gabbhaM dhariUNa sUi samayamhi/ suhamiccuNA marittA NiyamA devattu pAvaMti//264// je puNa sammAiTThI virayAvirayA vi tivihapattassa/ jAyaMti dANAphalao kappesu mahaDDhiyA devA//265// accharasayamajjhagayA tatthANuhaviUNa vivihasurasokkhaM/ tatto cuyA samANA maMDaliyAIsu jAyaMte//266// tattha vi bahuppayAraM maNuyasuhaM bhuMjiUNa NivvigghaM/ vigadabhayA veraggakAraNaM kiMci daTThUNa//267// paDibuddhiUNa caiUNa NivasiriM saMjamaM ca ghittUNa/ uppAiUNa NANaM keI gacchaMti NivvANaM//268// aNNe u sudevattaM sumANusattaM puNo puNo lahiUNa/ sattaTThabhavehi tao karaMti kammakkhayaM NiyamA//269// evaM pattavisesaM dANavihANaM phalaM ca NAUNa/ atihissa saMvibhAgo kAyavvo desaviradehiM//270// dhariUNa vatthamettaM pariggahaM chaMDiUNa avasesaM/ sagihe jiNAlae vA tivihAhArassa vosaraNaM//271// jaM kuNai gurusayAsammi sammamAloiUNa tiviheNa/ sallekhaNaM cautthaM sutte sikkhAvayaM bhaNiyaM//272// evaM vArasabheyaM vayaThANaM vaNNiyaM mae vidiyaM/ sAmAiyaM taijjaM ThANaM saMkhevao vocchaM//273// hoUNa suI ceiyagihammi sagihe va ceiyAhimuho/ aNNattha suipaese puvvamuho uttaramuho vA//274// jiNavayaNadhammaceiyaparameTThijiNAlayANa NiccaMpi/ jaM vaMdaNaM tiyAlaM kIrai sAmAiyaM taM khu//275// kAussaggamhi Thio lAhAlAhaM ca sattumittaM ca/ saMjoyavippajoyaM tiNakaMcaNa caMdaNaM vAsiM//276// jo passai samabhAvaM maNammi dhariUNa paMcaNavayAraM/ varaaTThapADiherehiM saMjuyaM jiNasarUvaM ca//277// siddhasarUvaM jhAyai ahavA jhANuttamaM sasaMveyaM/ khaNamekkamavicalaMgo uttamasAmAiyaM tassa//278// evaM taiyaM ThANaM bhaNiyaM sAmAiyaM samAseNa/ posahavihiM cautthaM ThANaM etto pavakkhAmi//279// uttamamajjhajahaNNaM tivihaM posahavihANam uddiTThaM/ sagasattIe mAsammi caussu pavvesu kAyavvaM//280// sattamiterasi divasammi atihijaNabhoyaNAvasANammi/ bhottUNa bhuMjaNijjaM tattha vi kAUNa muhasuddhiM//281// pakkhAliUNa vayaNaM karacaraNe NiyamiUNa tattheva/ pacchA jiNiMdabhavaNaM gaMtUNa jiNaM NamaMsittA//282// gurupurao kidiyammaM vaMdaNapuvvaM kameNa kAUNa/ gurusakkhiyam uvavAsaM gahiUNa cauvvihaM vihiNA//283// vAyaNakahANupehaNasikkhAvaNaciMtaNovaogehiM/ NeUNa divasasesaM avarANhiyavaMdaNaM kiccA//284// rayaNi samayamhi ThiccA kAussaggeNa NiyayasattIe/ paDilehiUNa bhUmiM appapamANeNa saMthAraM//285// dAUNa kiMci rattiM saiUNa jiNAlae Niyaghare vA/ ahavA sayalaM rattiM kAussaggeNa NeUNa//286// paccUse uTThittA vaMdaNavihiNA jiNaM NamaMsittA/ taha davvabhAvapujjaM jiNasuyasAhUNa kAUNa//287// uttavihANeNa tahA diyahaM rattiM puNo vi gamiUNa/ pAraNadivasammi puNo pUyaM kAUNa puvvaM va//288// gaMtUNa NiyayagehaM atihivibhAgaM ca tattha kAUNa/ jo bhuMjai tassa phuDaM posahavihi uttamaM hoi//289// jaha ukkassaM taha majjhimaM vi posahavihANam uddiTThaM/ Navara viseso salilaM chaMDittA vajjae sesaM//290// muNiUNa guruvakajjaM sAvajjavivajjiyaM NiyAraMbhaM/ jai kuNai taM pi kujjA sesaM puvvaM va NAyavvaM//291// AyaMbila NivvayaDI eyaTThANaM ca eyabhattaM vA/ jaM kIrai taM NeyaM jahaNNayaM posahavihANaM//292// siraNhANuvvaTTaNagaMdhamallakesAidehasaMkappaM/ aNNaM pi rAgaheuM vivajjae posahadiNammi//293// evaM cautthaThANaM vivaNNiyaM posahaM samAseNa/ etto kameNa sesANi suNaha saMkhevao vocchaM//294// jaM vajjijjai hariyaM tuyapattapavAlakaMdaphalabIyaM/ appAsugaM ca salilaM sacittaNivvitti taM ThANaM//295// maNavayaNakAyakayakAriyANumoehiM mehuNaM NavadhA/ divasammi jo vivajjai guNammi so sAvao chaTTho//296// puvvuttaNavavihANaM pi mehuNaM savvadA vivajjaMto/ itthikahAiNivitto sattamaguNabaMbhayArI so//297// jaM kiMci gihAraMbhaM bahu thogaM vA sayA vivajjei/ AraMbhaNiyattamaI so aTThamu sAvao bhaNio//298// mottUNa vatthametaM pariggahaM jo vivajjae sesaM/ tattha vi mucchaM Na karei jANai so sAvao Navamo//299// puTTho vApuTTho vA Niyagehi parehiM ca sagihakajjami/ aNumaNaNaM jo Na kuNai viyANa so sAvao dasamo//300// eyArasammi ThANe ukkiTTho sAvao have duviho/ vatthekkadharo paDhamo kovINapariggaho vidio//301// dhammillANaM cayaNaM karei kattari chureNa vA paDhamo/ ThANAisu paDilehai uvayaraNeNa payaDappA//302// bhuMjei pANipattammi bhAyaNe vA saiM samuvaiTTho/ uvavAsaM puNa NiyamA cauvvihaM kuNai pavvesu//303// pakkhAliUNa pattaM pavisai cariyAya paMgaNe ThiccA/ bhaNiUNa dhammalAhaM jAyai bhikkhaM sayaM ceva//304// sigghaM lAhAlAhe adINavayaNo NiyattiUNa tao/ aNNami gihe vaccai darisai moNeNa kAyaM vA//305// jai addhavahe koi vi bhaNai patthei bhoyaNaM kuNaha/ bhottUNa NiyayabhikkhaM tassaNNaM bhuMjae sesaM//306// aha Na bhaNai to bhikkhaM bhamejja NiyapoTTapUraNapamANaM/ pacchA eyammi gihe jAejja pAsugaM salilaM//307// jaM kiM pi paDiyabhikkhaM bhuMjijjo sohiUNa jatteNa/ pakkhAliUNa pattaM gacchijjo gurusayAsammi//308// jai evaM Na raejjo kAuMrisagihammi cariyAe/ pavisatti eyabhikkhaM pavittiNiyamaNaM tA kujjA//309// gaMtUNa gurusamIvaM paccakkhANaM cauvvihaM vihiNA/ gahiUNa tao savvaM AlocejjA payatteNa//310// em eva hoi biio Navariviseso kuNijja NiyameNa/ locaM dharijja picchaM bhuMjijjo pANipattammi//311// diNapaDimavIracariyAtiyAlajogesu Natthi ahiyAro/ siddhaMtarahassANa vi ajjhayaNaM desaviradANaM//312// uddiTThapiMDavirao duviyappo sAvao samAseNa/ eyArasammi ThANe bhaNio suttANusAreNa//313// eyArasesu paDhamaM vi jado NisibhoyaNaM kuNaMtassa/ ThANaM Na ThAi tamhA NisibhuttiM parihare NiyamA//314// cammaTThikIDauMdurabhuyaMgakesAi asaNamajjhammi/ paDiyaM Na kiM pi passai bhuMjai savvaM pi Nisisamaye//315// dIujjoyaM jai kuNai taha vi cauriMdiyA aparimANA/ NivaDaMti diTThirAeNa mohiyA asaNamajjhammi//316// iyaerisam AhAraM bhuMjaMto AdaNAsam iha loe/ pAuNai parabhavammi caugai saMsAradukkhAiM//317// evaM bahuppayAraM dosaM NisibhoyaNammi NAUNa/ tiviheNa rAibhuttI parihariyavvA have tamhA//318// viNao vijjAviccaM kAyakileso ya pujjaNavihANaM/ sattIe jahajoggaM kAyavvaM desaviraehiM//319// daMsaNaNANacaritte tava uvayArammi paMcahA viNao/ paMcamagaigamaNatthaM kAyavvo desaviraeNa//320// NissaMkiyasaMvegAi je guNA vaNNiyA mae puvvaM/ tesim aNupAlaNaM jaM viyANa so daMsaNo viNao//321// NANe NANuvayaraNe ya NANavaMtammi taha ya bhattIe/ jaM paDiyaraNaM kIrai NiccaM taM NANaviNao hu//322// paMcavihaM cArittaM ahiyArA je ya vaNNiyA tassa/ jaM tesiM bahumANaM viyANa cArittaviNao so//323// bAlo yaM buDDho yaM saMkappaM vajjiUNa tavasINaM/ jaM paNivAyaM kIrai tavaviNayaM taM viyANIhi//324// uvayArio vi viNao maNavacikAeNa hoi tiviyappo/ so puNa duviho bhaNio paccakkhaparokkhabheeNa//325// jaM duppariNAmAo maNaM NiyattAviUNa suhajoe/ ThAvijjai so viNao jiNehi mANassio bhaNio//326// hiyamiya pujjaM suttANuvIci apharasamakakkasaM vayaNaM/ saMjayijaNammi jaM cADubhAsaNaM vAcio vINao//327// kiriyammabbhuTThANaM NavaNaMjali AsaNuvakaraNadANaM/ ete paccuggamaNaM ca gacchamANe aNuvvajaNaM//328// kAyANurUvamaddaNakaraNaM kAlANurUvapaDiyaraNaM/ saMthArabhaNiyakaraNaM uvayaraNANaM ca paDilihaNaM//329// iccevamAi kAiyaviNao risisAvayANa kAyavvo/ jiNavayaNam aNugaNaMteNa desaviraeNa jahajoggaM//330// iya paccakkho eso bhaNio guruNA viNA vi ANAe/ aNuvaTTijjae jaM taM parokkhaviNao tti viNNeo//331// viNaeNa sasaMkujjalajasohadhavaliyadiyaMtao puriso/ savvattha havai suhao taheva AdijjavayaNo ya//332// je kei vi uvaesA ihaparaloe suhAvahA saMti/ viNaeNa gurujaNANaM savve pAuNai te purisA//333// deviMdacakkaharamaMDalIyarAyAijaM suhaM loe/ taM savvaM viNayaphalaM NivvANasuhaM tahA ceva//334// sAmaNNA vi ya vijjA Na viNayahINassa siddhim uvayAi/ kiM puNa NivvuivijjA viNayavihINassa sijjhei//335// sattU vi mittabhAvaM jamhA uvayAi viNayasIlassa/ viNao tiviheNa tao kAyavvo desaviraeNa//336// aibAlabuDDharogAbhibhUyataNukilesasattANaM/ cAuvvaNNe saMghe jahajoggaM taha maNuNNANaM//337// karacaraNapiTThasirasANaM maddaNaabbhaMgasevakiriyAhiM/ uvvattaNapariyattaNapasAraNAkuMcaNAIhiM//338// paDijaggaNehiM taNujoyabhattapANehiM bhesajehiM tahA/ uccarAINa vikiMcaNehiM taNudhovaNehiM ca//339// saMthArasohaNehi ya vijjAvaccaM sayA payatteNa/ kAyavvaM sattIe NivvidigiccheNa bhAveNa//340// NissaMkiyasaMvegAiya je guNA vaNNiyA maNovisayA/ te hoMti pAyaDA puNa vijjAvaccaM karaMtassa//341// dehatavaNiyamasaMjamasIlasamAhI ya abhayadANaM ca/ gai mai balaM ca diNNaM vijjAvaccaM karaMteNa//342// guNapariNAmo jAyai jiNiMdaANA ya pAliyA hoi/ jiNasamayatilayabhUo labbhai ayato vi guNarAsI//343// bhamai jae jasakittI sajjaNasuihiyayaNayaNasuhajaNaNI/ aNNevi ya hoMti guNA vijjAvacceNa ihaloe//344// paraloe vi sarUvo cirAuso royasoyaparihINo/ balateyasattajutto jAyai akhilappayAo vA//345// jallosahisavvosahiakkhINamahANasAiriddhIo/ aNimAiguNA ya tahA vijjAvacceNa pAuNai//346// kiM jaMpieNa bahuNA tilohasaMkhohakArayamahaMtaM/ titthayaraNAmapuNNaM vijjAvacceNa ajjei//347// taruNiyaNaNayaNamaNahArirUvabalateyasattasaMpaNNo/ jAo vijjAvaccaM puvvaM kAUNa vasudevo//348// vAravaIe vijjAviccaM kiccA asaMjadeNAvi/ titthayaraNAmapuNNaM samajjiyaM vAsudeveNa//349// evaM NAUNa phalaM vijjAvaccassa paramabhattIe/ NicchayajutteNa sayA kAyavvaM desaviraeNa//350// AyaMbila NivviyaDI eyaTThANaM chaTThamAikhavaNehiM/ jaM kIrai taNutAvaM kAyakileso muNeyavvo//351// mehAviNarA eeNa ceva bujjhaMti buddhivihaveNa/ Na ya maMdabuddhiNo teNa kiM pi vocchAmi savisesaM//352// AsADha kattie phagguNe ya siyapaMcamIe gurumUle/ gahiUNa vihiM vihiNA puvvaM kAUNa jiNapUjA//353// paDimAsamekkakhamaNeNa jAva vAsANi paMca mAsA ya/ avicchiNNA kAyavvA muttisuhaM jAyamANeNa//354// avasANe paMca ghaDAviUNa paDimAo jiNavariMdANaM/ taha paMca potthayANi ya lihAviUNaM sasattIe//355// tesiM paiTThayAle jaM kiM pi paiTThajoggamuvayaraNaM/ taM savvaM kAyavvaM patteyaM paMca paMca saMkhAe//356// sahiraNNa paMcakalase purao vitthAriUNa vatthamuhe/ pakkaNNaM bahubheyaM phalANi vivihANi taha ceva//357// dANaM ca jahAjoggaM dAUNa cauvvihassa saMghassa/ ujjavaNavihI evaM kAyavvA desaviraeNa//358// ujjavaNavihI Na tarai kAuM jai ko vi atthaparihINo/ to viuNA kAyavvA uvavAsavihI payatteNa//359// jai aMtarammi kAraNavaseNa ekko va do va upavAsA/ Na kao to mUlAo puNo vi sA hoi kAyavvA//360// esa kamo NAyavvo savvavihINaM bhaNijjamANANaM/ evaM NAUNa phuDaM Na pamAo hoi kAyavvo//361// paMcamiuvavAsavihiM kiccA deviMdacakkavaTTitte/ bhottUNa divyabhAe pacchA pAuNadi NivvANaM//362// vihiNA gahiUNa vihiM rohiNirikkhammi paMca vAsANi/ paMca ya mAsA jAva u upavAsaM tammi rikkhammi//363// kAUNujjavaNaM puNa puvvavihANeNa hoi kAyavvaM/ Navari viseso paDimA kAyavvA vAsupujjassa//364// tassa phaleNitthI vA puriso soyaM Na picchai kayA vi/ bhottUNa viulabhoe pacchA pAuNai NivvANaM//365// gahiUNassiNirikkhammi vihiM rikkhesu sattavIsesu/ rikkhaM paDi ekkekko uvavAso hoi kAyavvo//366// evaM kAUNa vihiM sattIe jo karei ujjavaNaM/ bhuttUNabbhudayasuhaM so pAvai akkhayaM sukkhaM//367// eyA paDivA vIyA u duNNi tIyA u tiNNi cautthIo/ cattAri paMcamIo paMca ya chaTThIu chaTTheva//368// satteva sattamIo aTThaTThammio ya Nava ya NavamIo/ dasa dasamIo ya tahA eyArasa eyArasIo ya//369// bArasa ya bArasIo teraha taha terasIo NAyavvA/ coddasa ya coddasIo paNNArasa puNNimAo ya//370// uvavAsA kAyavvA jahuttasaMkhAkameNa eyAsu/ esA NAmeNa vihI viNNeyA sukkhasaMpattI//371// eyasse saMjAyai phaleNa abbhudayasukkhasaMpattI/ kamaso muttisuhassa vi tamhA kujjA payatteNa//372// kAUNa aTTha eyaMtarANi raiyaraNagesu cattAri/ dahimuhaselesu puNo aMjaNajiNaceie chaTThaM//373// NaMdIsarammi dIve evaM causu vi disAsu kAyavvA/ uvavAsA esa vihI NaMdIsarapaMti NAmeNa//374// jaM kiM pi devaloe mahaDDhidevANa mANusANa suhaM/ bhottUNa siddhisokkhaM pAuNai phaleNa eyassa//375// eyaMtarovavAsA cattAri cauddisAsu kAUNa/ chaTThaM majjhe evaM tisaTThikhutto vihiM kujjA//376// paTThavaNe NiTThavaNe chaTThaM majjhammi aTThayaM ca tahA/ esa vihI NAyavvA vimANapaMti tti NAmeNa//377// phalameyasse bhottUNa devamaNuesu iMdiyajasukkhaM/ pacchA pAvai mokkhaM thuNijjamANo suriMdehiM//378// uddesamettameyaM kIrai aNNaM pi jaM sasattIe/ suttuttatavavihANaM kAyakilesu tti taM viMti//379// jiNasiddhasUripAThayasAhUNaM jaM suyassa vihaveNa/ kIrai vivihA pUjA viyANa taM pUjaNavihANaM//380// NAmaTThavaNAdavve khitte kAle viyANa bhAve ya/ chavvihapUyA bhaNiyA samAsao jiNavariMdehiM//381// uccAriUNa NAmaM aruhAINaM visuddhadesammi/ pupphANi jaM khivijjaMti vaNNiyA NAmapUyA sA//382// sabbhAvAsabbhAvA duvihA ThavaNA jiNehi paNNattA/ sAyAravaMtavatthummi jaM guNArovaNaM paDhamA//383// akkhayavarADao vA amugo eso tti NiyayabuddhIe/ saMkappirUNa vayaNaM esA viiyA asabbhAvA//384// huMDAvasappiNIe viiyA ThavaNA Na hodi kAyavvA/ loe kuliMgamaimohie jado hoi saMdeho//385// kArAvagiMdapaDimA paiTThalakkhaNavihiM phalaM ceva/ ede paMcahiyArA NAyavvA paDhamaThavaNAe//386// bhAgI vacchallapahAvaNAkhamAsaccamaddavovedo/ jiNasAsaNagurubhatto sutte kArAvago bhaNido//387// desakulajAisuddho NiruvamaaMgo visuddhasammatto/ paDhamANioyakusalo paiTThalakkhaNavihividaNNU//388// sAvayaguNovavedo uvAsayajjhayaNasatthathirabuddhI/ evaM guNo paiTThAirio jiNasAsaNe bhaNio//389// maNikaNayarayaNaruppayapittalamuttAhalovalAIhiM/ paDimAlakkhaNavihiNA jiNAipaDimA ghaDAvijjA//390// bArahaaMgaMgI jA daMsaNatilayA carittavatthaharA/ coddahapuvvAharaNA ThAveyavvA ya suyadevI//391// ahavA jiNAgamaM putthaesu sammaM lihAviUNa tao/ suhatihilaggamuhutte AraMbho hoi kAyavvo//392// aTThadasahatthamettaM bhUmiM saMsohiUNa jaiNAe/ tassuvari maMDao puNa kAyavvo tappamANeNa//393// cautoraNacaudArovasohio vivihavatthakayabhUso/ dhuvvaMtadhayavaDAo NANApupphovahAraDDho//394// laMbaMtakusumadAmo vaMdaNamAlAhibhUsiyaduvAro/ dAruvari uhayakoNesu puNNakalasehi ramaNIo//395// tassabahumajjhadese paiTThasatthammi vuttamANeNa/ samacauraMsaM pIThaM savvattha samaM ca kAUNa//396// causu vi disAsu toraNavaMdaNamAlovavedadArANi/ NaMdAvattANi tahA diDhANi raiUNa koNesu//397// paDicINaNettapaTTAiehiM vatthehiM bahuvihehiM tahA/ ulloviUNa uvariM caMdovayamaNivihANehiM//398// saMbhUsiUNa caMdaddhacaMdavuvvuyavarAyalAIhiM/ muttAdAmehiM tahA kiMkiNijAlehiM vivihehiM//399// chattehiM cAmarehiM ya dappaNabhiMgAratAlavaTTehiM/ kalasehi pupphavaDiliyasupaiTThayadIvaNivahehiM//400// evaM rayaNaM kAUNa tao abbhaMtarammi bhAgammi/ raiUNa vivihabhaMDehiM veiyaM causu koNesu//401// iMdo taha dAyAro pAsuyasalileNa dhAraNAdiNhe/ pakkhAliUNa dehaM pacchA bhottUNa mahuraNNaM//402// uvavAsaM puNa posahavihiNA gahiUNa gurusayAsammi/ NavadhavalavatthabhUso sirikhaMDavilittasavvaMgo//403// AharaNavAsiyAIhiM bhUsiyaMgo sagaM sabuddhIe/ sakkohamii viyappiya visejja jAgAvaNiM iMdo//404// puvvuttaveimajje lihejja cuNNeNa paMcavaNNeNa/ pihukaNNiyaM paiTThAkalAvavihiNA sukaMdutthaM//405// raMgAvaliM ca majjhe Thavijja siyavatthaparivuDaM pIThaM/ ucidesu taha paiTThovayaraNadavvaM ca ThANesu//406// evaM kAUNa tao IsANadisAe veiyaM divvaM/ rahaUNa NhavaNapIThaM tisse majjhammi ThAvejjo//407// aruhAINaM paDimaM vihiNA saMThAviUNa tassuvariM/ dhUlIkalasahiseyaM karAvie suttahAreNa//408// vatthAdiyasammANaM kAyavvaM hodi tassa sattIe/ pokkhaNavihiM ca maMgalaraveNa kujjA tao kamaso//409// tappAogguvayaraNaM appasamIvaM NivisiUNa tao/ AgarasuddhiM kujjA paiTThasatthuttamaggeNa//410// evaM kAUNa tao khuhiyasamuddovva gajjamANehiM/ varabherikaraDakAhalajayaghaMTAsaMkhaNivahehiM//411// gulugulugulaMta tavilehiM kaMsatAlehiM jhamajhamaMtehiM/ ghummaMta paDahamaddalahuDukkamukkhehiM vivihehiM//412// gijjamta saMdhibaMdhAiehiM geehiM bahupayArehiM/ vINAvaMsehiM tahA ANayasaddehiM rammehiM//413// bahuhAvabhAvavibbhamavilAsakaracaraNataNuviyArehiM/ NaccaMta NavarasubbhiNNaNADaehiM vivihehiM//414// thottehi maMgalehi ya DaccAhasaehi mahuravayaNassa/ dhammANurAyarattassa cAuvvaNNassa saMghassa//415// bhattIe picchamANassa tao uccAiUNa jiNapaDimaM/ ussiyasiyAyavattaM siyacAmaradhuvvamANasavvaMgaM//416// AroviUNa sIse kAUNa payAhiNaM jiNagehassa/ vihiNA Thavijja puvvuttaveiyAmajjhapIThammi//417// ciTThejja jiNaguNArovaNaM kuNaMto jiNiMdapaDibiMve/ iTThavilaggassudae caMdaNatilayaM tao dijjA//418// savvAvayavesu puNo maMtaNNAsaM kuNijja paDimAe/ vivihaccaNaM ca kujjA kusumehiM bahuppayArehiM//419// dAUNa muhapaDaM dhavalavatthajuyaleNa mayaNaphalasahiyaM/ akkhayacarudIvehi ya dhUvehiM phalehiM vivihehiM//420// balivattiehiM jAvAraehi ya siddhatthapaNNarukkhehiM/ puvvuttuvayaraNehi ya raejja pujjaM savihaveNa//421// rattiM jaggijja puNo tisaTThisalAyapurisasukahAhiM/ saMgheNa samaM pujjaM puNo vi kujjA pahAyammi//422// evaM cattAri diNANi jAva kujjA tisaMjha jiNapUjA/ nettummIlaNapujjaM cautthaNhavaNaM tao kujjA//423// evaM NhavaNaM kAUNa satthamaggeNa saMghamajjhammi/ to vakkhamANavihiNA jiNapayapUyA ya kAyavvA//424// gahiUNa sisirakarakiraNaNiyaradhavalayararayayabhiMgAraM/ mottiyapavAlamaragayasuvaNNamaNi khaciyavarakaMThaM//425// sayavattakusuma kuvalayarajapiMjarasurahivimalajalabhariyaM/ jiNacaraNakamalapurao khivijji o tiNNi dhArAo//426// kappUrakuMkumAyaruturukkamIseNa caMdaNaraseNa/ varavahalaparimalAmoyavAsiyAsAsamUheNa//427// vAsANumaggasaMpattamuiyamattAlirAvamuhaleNa/ suramauDadhiTThacalaNaM bhattIe samalahijja jiNaM//428// sasikaMtakhaMDavimalehiM vimalajalasitta aisuyaMdhehiM/ jiNapaDimapaiTThayajjiyavisuddhapuNNaMkurehiM va//429// vara kalamasAlitaMDulacaehiM suchaMDiyadohasayalehiM/ maNuyasurAsuramahiyaM pujjijja jiNiMdapayajuyalaM//430// mAlaikayaMbakaNayAricaMpayAsoyabaulatilaehiM/ maMdAraNAyacaMpayapaumuppalasiMduvArehiM//431// kaNavIramalliyAhiM kacaNAramacakuMdakiMkarAehiM/ suravaNaja jUhiyApArijAtayajAsavaNaTagarehiM//432// sovaNNaruppimehiyamuttAdAmehiM bahuviyappehiM/ jiNapayapaMkayajuyalaM pujjijja suriMdasayamahiyaM//433// dahiduddhasappimissehiM kalamabhattehiM bahuppayArehiM/ tevaTThiviMjaNehiM ya bahuvihapakkaNNabheehiM//434// ruppayasuvaNNakaMsAithAliNihiehiM vivihabhakkhehiM/ pujjaM vitthArijjo bhattIe jiNiMdapayapurao//435// dIvehiM NiyapahohAmiyakkateehi dhUmarahiehiM/ maMdaM calamaMdANilavaseNa NaccaMta accIhiM//436// ghaNapaDalakammaNivahavva dUramavasAriyaMdhayArehiM/ jiNacaraNakamalapurao kuNijja rayaNaM subhattIe//437// kAlAyaruNahacaMdahakappUrasilhArasAidavvehiM/ NippaNadhUmavattIhiM parimalAyattiyAlIhiM//438// uggasihAdesiyasaggamokkhamaggehi bahaladhUmehiM/ dhUvijja jiNiMdapayAraviMdajuyalaM suriMdaNuyaM//439// jaMbIramocadADimakavitthapaNasaNAlierehiM/ hiMtAlatAlakhajjUraNiMbunAraMgacArehiM//440// pUIphalatiMduAmalayajaMbuvillAisurahimiTThehiM/ jiNapayapurao rayaNaM phalehi kujjA supakkehiM//441// aTThavihamaMgalANi ya bahuvihapUjovayaraNadavvANi/ dhUvadahaNAi tahA jiNapUyatthaM vitIrijjA//442// evaM calapaDimAe ThavaNA bhaNiyA thirAe emeva/ Navariviseso AgarasuddhiM kujjA suThANammi//443// cittapaDilevapaDimAe dappaNaM dAviUNa paDibiMbe/ tilayaM dAUNa tao muhavatthaM dijja paDimAe//444// AgarasuddhiM ca karejja dappaNe aha va aNNapaDimAe/ ettiyamettaviseso sesavihI jANa puvvaM va//445// evaM ciraMtaNANaM pi kaTTimAkaTTimANa paDimANaM/ jaM kIrai bahumANaM ThavaNApujjaM hi taM jANa//446// je puvvasamuddiTThA ThavaNApUyAe paMca ahiyArA/ cattAri tesu bhaNiyA avasANe paMcamaM bhaNimo//447// davveNa ya davvassa ya jA pUjA jANa davvapUjA sA/ davveNa gaMdhasalilAipuvvabhaNieNa kAyavvA//448// tivihA davve pUjA saccittAcittamissabheeNa/ paccakkhajiNAINaM sacittapUjA jahAjoggaM//449// tesiM ca sarIrANaM davvasudassa vi acittapUjA sA/ jA puNa doNhaM kIrai NAyavvA missapUjA sA//450// ahavA AgamaNoAgamAibheeNa bahuvihaM davvaM/ NAUNa davvapUjA kAyavvA suttamaggeNa//451// jiNajammaNaNikkhamaNe NANuppattIe titthaciNhesu/ NisihIsu khettapUjA puvvavihANeNa kAyavvA//452// gabbhAvayArajammAhiseyaNikkhamaNaNANaNivvANaM/ jamhi diNe saMjAdaM jiNaNhavaNaM taddiNe kujjA//453// icchurasasappidahikhIragaMdhajalapuNNavivihakalasehiM/ NisijAgaraNaM ca saMgIyaNADayAIhiM kAyavvaM//454// NaMdIsaraTThadivasesu tahA aNNesu uciyapavvesu/ jaM kIrai jiNamahimaM viNNeyA kAlapUjA sA//455// kAUNANaMtacauTThayAiguNakittaNaM jiNAINaM/ jaM vaMdaNaM tiyAlaM kIrai bhAvaccaNaM taM khu//456// paMcaNamokkArapaehiM ahavA jAvaM kuNijja sattIe/ ahavA jiNiMdatthottaM viyANa bhAvaccaNaM taM pi//457// piMDatthaM ca payatthaM rUvatthaM rUvavajjiyaM ahavA/ jaM jhAijjai jhANaM bhAvamahaM taM viNiddiTThaM//458// siyakiraNavipphuraMtaM aTThamahApADiherapariyariyaM/ jhAijjai jaM NiyayaM piMDatthaM jANa taM jhANaM//459// ahavA NAhiM ca viyappiUNa meruM ahovihAyammi/ jhAijja aholoyaM tiriyammaM tiriyae vIe//460// uDDhammi uDDhaloyaM kappavimANANi saMdhapariyaMte/ gevijjamayA gIvaM aNuddisaM haNupaesammi//461// vijayaM ca vaijayaMtaM jayaMtamavarAjiyaM ca savvatthaM/ jhAijja muhapaese NilADadesammi siddhasilA//462// tassuvari siddhaNilayaM jaha siharaM jANa uttamaMgammi/ evaM jaM NiyadehaM jhAijjai taM pi piMDatthaM//463// jaM jhAijjai uccAriUNa parameTThimaMtapayamamalaM/ eyakkharAdi vivihaM payatthajhANaM muNeyavvaM//464// suNNaM ayArapurao jhAijjo uDDharehabiMdujuyaM/ pAvaMdhayAramahaNaM samaMtao phuriyasiyateyaM//465// a si A u sA suvaNNA jhAyavvA NaMtasattisaMpaNNA/ caupattakamalamajjhe paDhamAikameNa NivisiUNaM//466// te ciya vaNNA aTThadala paMcakamalANa majjhadesesu/ NisiUNa sesaparameTThi akkharA causu pattesu//467// rayaNattayatavapaDimAvaNNA NivisiUNa sesapattesu/ siravayaNakaMThahiyae NAhipaesammi jhAyavvA//468// ahavA NilADadese paDhamaM bIyaM visuddhadesammi/ dAhiNadisAi NivisiUNa sesakamalANi jhAejjo//469// aTThadalakamalamajjhe jhAejja NahaM durehabiMdujuyaM/ siripaMcaNamokkArehiM valaiyaM pattarehAsu//470// NisiUNa Namo arahaMtANaM pattAimaTThavaggehiM/ bhaNiUNa veDhiUNa ya mAyAbIeNa taM tiuNaM//471// AyAsaphalihasaMNihataNuppahAsalilaNihiNibbuDaMtaM/ NarasuratirIDamaNikiraNasamUharaM jiyapayaMburuho//472// varaaTThapADiherehiM pariuTTho samavasaraNamajjhagao/ paramappANaMtacauTThayaNNio pavaNamaggaTTho//473// erisao cciya parivAravajjio khIrajalahimajjhe vA/ varakhIravaNNakaMduttha kaNNiyAmajjhadesaTTho//474// khIruvahisaliladhArAhiseyadhavalIkayaMgasavvaMgo/ jaM jhAijjai evaM rUvatthaM jANa taM jhANaM//475// vaNNarasagaMdhaphAsehiM vajjio NANadaMsaNasarUvo/ jaM jhAijjai evaM taM jhANaM rUvarahiyaM ti//476// ahavA AgamaNoAgamAi bheehiM suttamaggeNa/ NAUNa bhAvapujjA kAyavvA desaviraehiM//477// esA chavvihapUjA NiccaM dhammANurAyarattehiM/ jahajoggaM kAyavvA savvehiM pi desaviraehiM//478// eyArasaMgadhArI jIhasahasseNa suravariMdo vi/ pUjAphalaM Na sakkai NissesaM vaNNiuM jamhA//479// tamhA haM NiyasattIe thoyavayaNeNa kiM pi vocchAmi/ dhammANurAyaratto bhaviyajaNo hoi jaM savvo//480// kutthuMbharidalabhette jiNabhavaNe jo Thavei jiNapaDimaM/ sarisavamettaM pi lahei so Naro titthayarapuNNaM//481// jo puNa jiNiMdabhavaNaM samuNNayaM parihitoraNasamaggaM/ NimmAvai tassa phalaM ko sakkai vaNNiuM sayalaM//482// jaladhArANikkheveNa pAvamalasohaNaM have NiyamaM/ caMdaNaleveNa Naro jAvai sohaggasaMpaNNo//483// jAyai akkhayaNihirayaNasAmio akkhaehi akkhoho/ akkhINaladdhijutto akkhayasokkhaM ca pAvei//484// kusumehiM kusesayavayaNu taruNIjaNaNayaNakusamavaramAlA/ valaeNacciyadeho jayai kusumAuho ceva//485// jAyai NivijjadANeNa sattigo kaMtiteya saMpaNNo/ lAvaNNajalahivelAtaraMgasaMpAviyasarIro//486// dIvehiM dIviyAsesajIvadavvAitaccasabbhAvo/ sabbhAvajaNiyakevalapaIvateeNa hoi Naro//487// dhUveNa sisirayaradhavalakittidhavaliyajayattao puriso/ jAyai phalehi saMpattaparamaNivvANasokkhaphalo//488// ghaMTAhiM ghaMTasaddAulesu pavaraccharANamajjhammi/ saMkIDai surasaMghAyasevio varavimANesu//489// chattehiM eyachattaM bhuMjai puhavI savattaparihINo/ cAmaradANeNa tahA vijjijjai camaraNivahehiM//490// ahiseyaphaleNa Naro ahisiMcijjai sudaMsaNassuvariM/ khIroyajaleNa suriMdappamuhadevehiM bhattIe//491// vijayapaDAehiM Naro saMgAmamuhesu vijaio hoi/ chakkhaMDavijayaNAho NippaDivakkho jasassI ya//492// kiM jaMpieNa bahuNA tIsu vi loesu kiM pi jaM sokkhaM/ pUjAphaleNa savvaM pAvijjai Natthi saMdeho//493// aNupAliUNa evaM sAvayadhammaM taovasANammi/ sallehaNaM ca vihiNA kAUNa samAhiNA kAlaM//494// sohammAisu jAyai kappavimANesu accuyaMtesu/ uvavAdagihe komalasuyaMdhasilasaMpuDassaMte//495// aMtomuhuttakAleNa tao pajjattio samANei/ divvAmaladehadharo jAyai NavajuvvaNo ceva//496// samacaurasasaMThANo rasAidhAUhiM vajjiyasarIro/ diNayarasahassateo NavakuvalayasurahiNissAso//497// paDibujjhiUNa suttuTThio vva saMkhAimahurasaddehiM/ daTThUNa suravibhUiM viMbhiyahiyao paloei//498// kiM sumiNadaMsaNamiNaM Na vetti jA ciTThae viyappeNa/ AyaMti takkhaNaM ciya thuimuhalA AyarakkhAI//499// jaya jIva NaMda vaDDhAicArusaddehi soyarammehiM/ accharasayAu vi tao kuNaMti cADUNi vivihANi//500// evaM thuNijjamANo sahasA NAUNa ohiNANeNa/ gaMtUNa NhANagehaM vuDDuNavAvimhi NhAUNa//501// AharaNagihammi tao solasahAbhUsaNaM ca gahiUNa/ pUjovayaraNasahio gaMtUNa jiNAlae sahasA//502// varavajjavivihamaMgalaravehiM gaMdhakkhayAidavvehiM/ mahiUNa jiNavariMdaM thuttasahassehiM thuNiUNa//503// gaMtUNa sabhAgehaM aNeyasurasaMkulaM paramarammaM/ siMhAsaNassa uvariM ciTThai devehiM thuvvaMto//504// ussiyasiyAyavatto siyacAmaradhuvvamANasavvaMgo/ pavaraccharAhiM kIDai divvaTThaguNappahAveNa//505// dIvesu sAyaresu ya surasaritIresu selasiharesu/ akhaliyagamaNAgamaNo devujjANAisu ramei//506// AsADha kAttie phagguNe ya NaMdIsaraTThadivasesu/ vivihaM karei mahimaM NaMdIsaraceiyagihesu//507// paMcasu merusu tahA vimANajiNaceiesu vivihesu/ paMcasu kallANesu ya karei pujjaM bahuviyappaM//508// iccAibahuviNoehi tattha viNeUNa sagaTThiI tatto/ uvvaTTio samANo cakkaharAIsu jAei//509// bhottUNa maNuyasokkhaM passiya veraggakAraNaM kiM ci/ mottUNa rAyalacchI taNaM va gahiUNa cArittaM//510// kAUNa tavaM ghoraM laddhIo tapphaleNa laddhUNa/ aTThaguNe sariyattaM ca kiM Na sijjhai taveNa jae//511// buddhi tavo vi ya laddhI viuvvaNaladdhI taheva osahiyA/ rasabalaakkhINA vi ya riddhIo satta paNNattA//512// aNimA mahimA laghimA pAgamma vasitta kAmarUvittaM/ Isatta pAvaNaM taha aTThaguNA vaNNiyA samae//513// evaM kAUNa tavaM pAsuyaThANammi taha ya gaMtUNa/ paliyaMkaM baMdhittA kAussaggeNa vA ThiccA//514// jai khAiyasaddiTThI puvvaM khaviyAu satta payaDIo/ suraNirayatirikkhAU tamhi bhave NiTThiyaM ceva//515// aha bedagasaddiTThI pamattaThANammi appamatte vA/ sariUNa dhammajhANaM satta vi NiTThavai payaDIo//516// kAUNa pamatteyarapariyattasayANi khavayapAuggo/ hoUNa appamatto visohimAUriUNa khaNaM//517// karaNaM adhApavattaM paDhamaM paDivajjiUNa sukkaM ca/ jAyai apuvvakaraNo kasAyakhavaNujjao vIro//518// ekkekkaM ThidikhaMDaM pADai aMtomuhuttakAleNa/ ThidikhaMDapaDaNakAle aNubhAgasayANi pADei//519// gacchai visuddhamANo paDisamayam aNaMtaguNavisohIe/ aNiyaTThiguNaM tattha vi solaha payaDIo pADei//520// aTTha kasAe ca tao NavusayaM taheva itthiveyaM ca/ chaNNokasAya purisaM kameNa kohaM pi saMchuhai//521// kohaM mANe mANaM mAyAe taM pi chuhai lohammi/ bAyaralohaM pi tao kameNa NiTThavai tattheva//522// aNulohaM vedaMto saMjAyai suhumasaMparAyo so/ khaviUNa suhumalohaM khINakasAo tao hoi//523// tattheva sukkajhANaM vidiyaM paDivajjiUNa to teNa/ NiddApayalAu due ducarimasamayammi pADei//524// NANaMtarAyadasayaM daMsaNa cattAri carimasamayammi/ haNiUNa takkhaNe cciya sajogikevalijiNo hoi//525// to so tiyAlagoyaraaNaMtaguNapajjayappayaM vatthuM/ jANai passai jugavaM NavakevalaladdhisaMpaNNo//526// dANe lAhe bhoe paribhoe vIrie sammatte/ NavakevalaladdhIo daMsaNa NANe caritte ya//527// ukkassaM ca jahaNNaM pajjAyaM vihariUNa sijjhei/ so akayasamugghAo jassAusamANi kammANi//528// jassa Na hu AusarisANi NAmAgoyANi veyaNIyaM ca/ so kuNai samugghAyaM NiyameNa jiNo Na saMdeho//529// chammAsAugasese uppaNNaM jassa kevalaM hojja/ so kuNai samugghAyaM iyaro puNa hoi bhayaNijjo//530// aMtomuhuttasesAugammi daMDaM kavADa payaraM ca/ jagapUraNamatha payaraM kavADa daMDaM NiyataNupamANaM ca//531// evaM paesapasaraNasaMvaraNaM kuNai aTThasamaehiM/ hohiMti joicarime aghAikammANi sarisANi//532// bAyaramaNavacijoge ruMbhai to thUlakAyajogeNa/ suhumeNa taM pi ruMbhai suhume maNavayaNajoge ya//533// to suhumakAyajoge vaTTaMto jhAie taiyasukkaM/ ruMbhittA taM pi puNo ajogikevalijiNo hoi//534// bAvattari payaDIo cautthasukkeNa tattha ghAei/ ducarimasamayamhi tao terasa carimammi NiTThavai//535// to tammi ceva samaye loyagge uDDhagamaNasabbhAo/ saMciTThai asarIro pavaraTThaguNappao NiccaM//536// sammatta NANa daMsaNa vIriya suhamaM taheva avagahaNaM/ agurulahumavvAbAhaM siddhANaM vaNNiyA guNaTThede//537// jaM kiM pi sokkhasAraM tisu vi loesu maNuyadevANaM/ tam aNaMtaguNaM pi Na eyasamayasiddhANubhUyasokkhasamaM//538// sijjhai taiyammi bhave paMcamae kovi sattamaTThamae/ bhuMjivi suramaNuyasuhaM pAvei kameNa siddhapayaM//539// AsI sasamayaparasamayavidU sirikuMdakuMdasaMtANe/ bhavvayaNakumuyavaNasisirayaro siriNaMdiNAmeNa//540// kittI jassiMdusubbhA sayalabhuvaNamajjhe jahicchaM bhamittA NiccaM sA sajjaNANaM hiyayavayaNasoe NivAsaM kareI/ jo siddhaMtaMburAsiM suNayataraNamAsejja lIlAvatiNNo/ vaNNeuM ko samattho sayalaguNagaNaM se viyaDDho vi loe//541// sisso tassa jiNiMdasAsaNarao siddhaMtapAraMgao khaMtImaddavalAhavAidasahAdhammammi Niccujjao/ puNNeMdujjalakittipUriyajao cArittalacchIharo saMjAo NayaNaMdiNAmamuNiNo bhavvAsayANaMdao//542// sisso tassa jiNAgamajalaNihivelAtaraMgadhoyamaNo/ saMjAo sayalajae vikkhAo Nemicandu tti//543// tassa pasAeNa mae AiriyaparaMparAgayaM satthaM/ vacchallayAe raiyaM bhaviyANamuvAsayajjhayaNaM//544// jaM kiM pi ettha bhaNiyaM ayANamANeNa pavayaNaviruddhaM/ khamiUNa pavayaNadharA sohittA taM payAsaMtu//545// chacca sayA paNNasuttarANi eyassa gaMthaparimANaM/ vasuNaMdiNA NibaddhaM vitthariyavvaM viyaDDhehiM//546// ity upAsakAdhyayanaM vasunandinA kRtam idaM samAptam/